По сараевските тротоари и улици, деновиве, се појавија графити со афирмативни ЛГБТ пораки. Во врска со истите, една ЛГБТ активистка од Босна и Херцеговина, која во разговор со Klix.ba вели дека пораките се многу јасни и изнесуваат јасен политички став кон земјата, градот и нивните институции.
„Уличните акции ги прават сите оние кои не сакаат да бидат видливи, од безбедносни причини, а нашиот глас исто така треба да биде чуен. Ова е тоа што во овој момент можевме да го направиме. Ќе оставам порака на улица, некој ќе ја прочита и ќе знае дека и јас шетам овде. Токму тоа е една од пораките „Лезбејки шетаат по градов“, затоа што кога и да се спомене нешто во врска со ЛГБТ темите, првиот најгласен и најсилен одговор е „Педерите нема да шетаат по овој град“, како истиве да не шетаат навистина, како да не‘ нема, како да не постоиме. Па, и лезбејки и транс лица шетаат по градот. И тоа никогаш не се знае. Тоа може да биде вашиот таксист, вашиот продавач, фризер или фризерка, професор или професорка… Постоиме“ – вели активистката која инсистираше на анонимност во разговорот.
На линија на тоа што уличните или герилските акции од секогаш постојат како форма на отпор кон системот, активистите ја истакнуваат универзалната вредност на нивните пораки кои може да се видат и по улиците во други градови и држави. Таа форма на активизам постои одамна, а во последните 20 години стана своевиден дел од субкултурата која за цел има испраќање на различни пораки и ставови.
„Од друга страна, ако постојано ви се говори за тоа дека вие (геј, лезбејките, бисексуалците/ките и транс лицата) сте ОК, но да останете тоа меѓу вашите четири ѕида, ние сакаме да кажеме дека нашите четири ѕида се и вон нашите домови или нашите сигурни простори. Живееме во ист град, и се движиме овде, и ги користиме услугите како и останатите, и оттука излегувањето по улиците е своевидно заземање на јавниот простор, кој е и наш. И ние го плаќаме чистењето и (не)средувањето на тие улици“ вели таа.
Активистичката група направила неколку стенсили со различни пораки, а една од нив се однесува и на Поворката на гордоста („Не ни е потребна поворка за да шетаме“). Истата, истакнуваат од групата, не значи дека поворката како политички чин не е потребна, туку дека е поврзана со она што другите го мислат за овој чин.
„Поентата е во тоа што нам ни е потребна таквата поворка секој ден (но не во она шарена смисла, која може да се забележи во земјите каде ЛГБТ луѓето значително ги оствариле нивните права). Поворка е и кога одиш во локалната продавница, и кога го изнајмуваш станот во кој живееш со партнерот или партнерката, поворка е и кога одиш на лекар и велиш „мојата партнерка е со мене“, кога си болен, бидејќи тоа паровите го прават. Тие ситуации се „поворка“ бидејќи никогаш не знаеш каква ќе биде реакцијата на другата страна, затоа е борбата, затоа што не знаеш дали ќе те препознаат или уште полошо – претпостават дека можеби се геј или лезбејка или транс лице“ вели соговорничката за Klix.ba.
Сепак, и покрај трудот на поединци, ЛГБТ активистите ценат дека таквиот труд никогаш нема да биде доволен за да се случат клучни општествени промени, односно потребно е и организациите кои се бават со ЛГБТ темите, како и другите организации кои работат во областа на човековите права кои треба да продолжат со својата работа.
Конечно, една од ЛГБТ активистите во Сараево порачува: „Луѓето, овде, не ја знаат разликата помеѓу хомосексуалноста и хетеросексуалноста, но по обичај мразат и сакаат да убиваат. Тоа е трагедијата. Јас повеќе не сум ни лута, туку навистина имам потреба на тие луѓе да им се доближам и им кажам – Добро, што поточно е твојот проблем? Бидејќи повикувањето на традицијата, моралот и останатите добри вредности е исперено. За која традиција зборуваме? Секако дека отсекогаш имало и хомосексуалци и трансродови личности, но биле скриени, дел од хетеробракови и длабоко несреќни. Дали ние денес сме посреќни? Ако ништо друго, не ги исполнуваме или ги исполнуваме помалку општествените очекувања, а борбата за препознавање е борба за еднакви граѓани и граѓанки, и истата продолжува“.
Извор: www.klix.ba
