На ден 08.03.2016 година, Агенцијата за аудио и аудиовизуелни медиумски услуги (АВМУ), го објави писмениот Извештај за извршен програмски надзор, а кој беше изработен од страна на Секторот за програмски работи. Од аспект на заложбите против користењето и ширењето на говор на омраза, истакнуваме дека Секторот за програмски работи во своите констатации покажа висок степен на познавање и стручност во примената на материјалното национално и меѓународно право како и во примена на праксата на Европскиот Суд за човекови права, а во врска со говорот на омраза.
Го поздравуваме нивото и начинот на кој се образложени констатациите во овој Извештај и посочуваме дека треба да служи како пример за сите институции кои имаат задача да спроведуваат мерки против говор на омраза во медиумскиот простор.
Напоменуваме дека оваа задача и исходите од неа се исклучително важни за едно демократско општество – какво што се стреми да биде македонското општество – прифаќајќи ги европските вредности. Оваа задача за институциите може да се оцени како приоритетна доколкусе земе предвид високиот степен на хомофобични содржини и користењето и ширењето на говорот на омраза во медиумите во Македонија во последните неколку години. Секторот за програмски работи при Агенцијата за медиуми, со овој извештај, укажа на тоа дека е возможно да се спроведе правда, во случај кога треба да се извршат одредени мерки против медиумите, кои не смеат да бидат имуни на санкција. Со ова, јасно се упатува на одговорноста за медиумските содржини кои се објавуваат на одреден медиум,особено доколку дискриминираат одредена заедница или пак шират говор на омраза.
Токму на таа линија, Секторот за програмски работи, дава предлог до директорот на АВМУ:
„Писмено да му укаже на Трговското радио-дифузно друштво КАНАЛ 5 ДООЕЛ Скопје, дека со изјавите и ставовите искажани од Миленко Неделковски во изданијата на неговите емисии „Миленко Неделковски Шоу“, емитувани на 15, 22, 29 јануари и 5 и 12 февруари, 2016 година поттикнува и шири дискриминација, нетрпеливост и омраза врз основа на сексуална ориентација со што го прекрши членот 48 од Законот за аудио и аудиовизуелни медиумски услуги.“
Спротивно на оваа пракса која АВМУ ја прокламираше со Извештајот, Основното јавно обвинителство (ОЈО) не го третира користењето и ширењето на говорот на омраза од страна на Миленко Неделковски. Хелсиншкиот Комитет за човекови права и ЛГБТИ Центарот за поддршка уште одамна и во многу наврати алармираа за говрот на омраза и посебно за хомофобичните содржини кои ги шири лицето Миленко Неделковски во своето шоу. Против ова лице досега се поднесени три кривични пријави за кривични дела Предизвикување национална, расна и верска омраза, раздор и нетрпеливост член 319 ст. 1 од КЗ на РМ, Ширење на расистички и ксенофобичен материјал преку компјутерски систем член 394-г ст.1 од КЗ на РМ и кривично дело Расна и друга дискриминација чл.417 ст.1 од КЗ на РМ. Досега ОЈО има постапено единствено по последната кривична пријава, но и во овој случај ОЈО Скопје не утврдува елементи на говор на омраза. Игнорирањето на говорот на омраза од страна на ОЈО како институција е неприфатливо особено доколку се земе предвид природата на овие кривични дела, но и фактот дека непостапувањето на ОЈО по кривични пријави за говор на омраза може да се смета за охрабрување насторителите.
Овој повод на позитивен Извештај на АВМУ, кој може да се користи како документиран институционален придонес, го користиме со цел да потсетиме на важноста од сузбивање на говорот на омраза во јавниот дискурс. Хелсиншкиот комитет за човекови права на РМ, во овој правец ги насочи и активностите со вршењето на статистика за користењето и ширењето на говор на омраза, како и подготвувањето на „Анализа на состојбата со говор на омраза во Република Македонија“.
