Музичката група ‘‘Arcade Fire‘‘ во одбрана на музичкото видео за песната ,,Ние постоиме‘‘

На почетокот од овој месец, музичката група ‘‘Аrcade Fire‘‘ го промовираа видеото за песната ,,Ние постоиме‘‘ каде што актерот Ендру Гарфилд настапува како транс протагонист, кој ја бричи својата глава, става перика и наидува на големо прифаќање од страна на публиката на концерт на ‘‘Arcade Fire‘‘.

Пејачот на ‘‘Arcade  Fire‘‘ Вин Батлер во неодамнешното интервју за ‘‘The Advocate‘‘ посочува на тоа дека песната е инспирирана од искуството на групата со снимањето на албумот ,,Рефлектор‘‘ во Јамајка, каде што посведочиле изразена хомофобија на островот и изложеност на ЛГБТИ заедницата на сериозно насилство. ,,Сретнавме некои деца од Јамајка и од разговорот со нив, разбравме дека тие се константно под насилни закани‘‘ споделува Батлер. Во интервјуто понатаму, Батлер, кој тргнува од комотноста и навикнатоста на ,,либералниот меур‘‘ во кој живееме, ја истакнува својата шокираност од тоа дека во некои делови од светот (кои не се толку толерантни) различниот начин на облекување или воопшто различниот начин на изразување предизвикува сериозна тензија. Во тој правец, Батлер посочува на одлуката на судија од Кингстон со која на припадниците на ЛГБТИ заедницата кои се избркани од своите домови им се одобрува да се сместат во градската канализација, откако претходно биле присилени да не ги користат напуштените згради како привремени престојувалишта.

И покрај значајниот гест на ‘‘Arcade Fire‘‘ за транс лицата, сепак не изостана критика околу изборот на протагонистот за музичкото видеото за песната ,,Ние постоиме‘‘. Фронт-жената на ‘‘Аgainst me‘‘ Лаура Џејн Грејс, која и самата е транс жена, се спротивстави на одлуката на групата да го ангажираат глумецот Ендру Гарфилд како протагонист во видеото, наместо да ангажираат вистински транс актер.

На таквата реакција, пејачот Вин Батлер посочува на сензитивноста на темата, но не се согласува целосно со таквиот став, напротив, смета дека е многу моќно кога главниот актер од ,,Неверојатниот Спајдермен‘‘ остварува таква улога во видеото за песната, и кога тоа е проследено од геј момче од Јамајка. 

Извор: http://www.dazeddigital.com/artsandculture/article/20015/1/arcade-fire-defends-controversial-we-exist-music-video