Победата на левичарската коалиција Сириза на последните парламентарни избори во Грција, под водство на Алексис Ципрас, не беше изненадувачка, туку очекувана имајќи ги предвид резултатите од сите анкети во предизборниот период. Всушност, единствената дилема околу тоа беше дали Ципрас ќе успее да освои релативно или апсолутно мнозинство во парламентот.
Конечниот исход од изборите е освојување на 149 места во парламентот од страна на Сириза (од вкупно 300), додека владеачката коалиција ќе биде во соработка со десната партија Независни Грци во водство на Панос Каменос.
Најчестите прашања во врска со победата на Сириза, во голем дел, се однесуваат на тоа како Ципрас ќе се справи со долгот на Грција, за односот со моќните земји и меѓународните политички односи, како и односите со Европската комисија и Меѓународиот монетарен фонд. Исто така, победата нужно ги повлекува и пошироките состојби со зајакнување на левичарските движења во цела Европа, каков што е примерот со Подемос во Шпанија.
Сега, ден после „историските избори“ во Грција – како што беа досега нарекувани, треба да се потсети на фактот дека Сириза во предизборниот период беше единствената политичка групација која ги споменуваше ЛГБТ темите. Имено, Грција во рамките на Европската унија припаѓа на оние земји кои ги поттикнувале прашањата околу законско регулирање на позициите на ЛГБТ луѓето. Од почетокот, Сириза тврдеше дека ќе ја застапува рамноправноста на истополовите парови, учествуваше на Поворките на гордоста во Атина и ја изразуваше поддршката за здруженијата на трансродовите лица. Иако, се чини дека реформите во оваа област, сепак, ќе одат побавно отколку што беше најавувано, затоа што Сириза делумно ретерираше од својот прогресивен ЛГБТ дискурс.
За почеток, Ципрас најавуваше дека институтот животни партнерства ќе ги вклучува и истополовите парови, при што претходната Влада на Нова демократија пропушти да го оствари тоа. Имено, Европскиот суд за човекови права ја осуди Грција во 2013 година заради невклучувањето на истополовите парови во овој закон. И покрај тоа што на европско рамниште, не постои обврска за признавање на правниот статус на ЛГБТ луѓето, судот го најде за неосновано исклулувањето на луѓето со хомосексуална ориентација од тој закон.
Но Ципрас, и покрај декларираната желба за рамноправност, последните месеци промени дел од своите ставови. Така, испрати пораки со кои што упати за потребата од „понатамошен дијалог“ околу прашањата за посвојување деца од страна на истополови парови. Непостоењето на усогласен став по однос на овие прашања е причина за Ципрас истите да не бидат дел од неговата програма.
ЛГБТ активистот Грегориј Валијанатос за францускиот магазин Yagg рече дека почетниот ентузијазам околу победата Сириза е сепак разблажен, откако ставот за посвојувањето на децата беше променет непосредно пред одржувањето на изборите. Дополнително ретерирање од ставовите постои и околу регулирањет она правниот статус на трансродовите лица.
Федерацијата на младите зелени во рамки на Европската унија (FYEG), исто така, го изрази своето негодување и порача дека не треба да се повлекуваат од Сириза од правото на истополовите парови само заради добивање на повеќе гласови. „Нашите очекувања се високи околу промената во Грција, и истите се поврзани со градењето на општество засновано на еднаквост“ – стои меѓудругото во нивната порака.
Извор: www.crol.hr
