Славчо Димитров – Стравот нема да биде темел на нашата иднина

Вчера, 26 април, во Скопје, беше нападнат граѓанскиот активист Славчо Димитров, извршен директор на Коалицијата „Сексуални и здравствени права на маргинализираните заедници“. Ова следуваше брзо по директниот вербален и физички напад и врз активистот Никола Наумовски. Имајќи ја предвид актуелната политичка констелација, овие гестови кон граѓанството ја одразуваат насилничката официјална политика, но и потребата за цврсто спротивставување против истата.

Славчо Димитров, на таа линија,  во врска со нападот врз него, на својот фејсбук профил напиша: 

„Денеска во 17 часот, на силна дневна светлина, во центарот на градот бев тенденциозно нападнат од непознато лице, очигледно дел од безличната маса на насилието што ја креира со години оваа монструозна власт.
Со сигурен чекор, насочен кон мене, громадна фигуретина, покривајќи го лицето и главата со качулка на само неколку метри движејќи се наспроти мене, ми пренесе ‘поздрав’ и ми удри силен бокс, по што избега. Жалам што не успеав да слушнам што изговори откако рече ‘те поздрави…’ бидејќи р’жеше со здивен адреналин додека ја вперуваше тупаницата во мое лице.
За среќа поминав со набиеница на вилицата и крв во устата. За жал беа загрозени и моја пријателка и пријател кои во тој момент беа со мене. За жал, јасно е дека нема нити педа простор во овој град што е веќе безбеден. За жал, демонстрацијата на насилието стана нивен трофеј. За жал, се зезнале ако мислат дека стравот кој ме тресеше додека црната маска ми го истрауматизира целото тело, ќе биде темел на мојата, на нашата иднина.“

Борбата продолжува. Ќе победиме.