Врховниот Суд на САД во последниве два дена расправаше за законот за истополови бракови. Оваа постапка ја изразува промената во ставот на Американците кон геј браковите.
Во вториот ден од усната расправа, мнозинството во судот изрази загриженост со законот DOMA (Defense of Marriage Act,), закон кој ги ограничува бенефициите само на хетеросексуалните брачни парови, донесен во 1996 во времето на претседателот Бил Клинтон.
Расправите се одвиваа по прашањето за DOMA и прашањето за можната забрана за геј бракови во Калифорнија, и го означија првото дејствување на судот во рамките на едно многе деликатно политичко, религиозно и социјално прашање, во време во кое анкетите покажуваат растечка поддршка за истополовите бракови.
Теоретски гледано, случаите со себе носат потенцијал за судот да направи значаен чекор кон одобрување на геј браковите, кои добиваат поддршка во некои делови од земјата. Врз основа на аргументите, поверојатно е активистите за геј правата да извојуваат само делумна победа, наместо да добијат сеопфатно одобрување на правата за истополовите бракови кои тие ги бараат.
Во спротивност на амбивалентниот пристап кон предлогот 8, за забрана на геј браковите во Калифорнија, кој го имаа во вторникот, деветте судии покажаа волја да се осврнат и на прашањето за DOMA, истовремено разгледувајќи процедурални прашања.
Не се очекува судот да донесе одлука за овие два случаи до крајот на Јуни. Доколку судиите го соборат законот DOMA, законски венчаните геј парови би добиле поголем пристап до федералните бенефиции, како на пример намалување на даноците.
Постојат индикации дека може да биде донесена одлука по предлогот 8 процедурално, но дури и ова би се сметало за победа за активистите за геј права, затоа што истополовите бракови во Калифорнија би продолжиле да бидат легални.
Она што не е веројатно е донесувањето на сеопфатна декларација за правото на геј паровите да се венчаваат, ова е возможно само во случајот на Калифорнија.
Севкупно, поголемиот дел судии јасно покажаа дека, иако нема да го отежнуваат патот кон геј браковите во некои држави, исто така нема ниту да го олеснуваат.
Геј браковите се легални во 9 држави, во 30 држави постојат уставни амандмани со кои се забрануваат, додека другите имаат неодреден став.
Во повеќе наврати во изминатите два дена, самите забелешки на судиите покажаа колку брзо ставовите се имаат променето во корист на геј браковите.
Доколку судот го реши прашањето за правата во државите, судиите би можеле да го укинат законот без да одлучуваат за поголемиот проблем – дали DOMA го прекршува Уставот на САД од аспект на еднаква заштита пред законите.
Постојат повеќе групи кои бараат DOMA да биде укинат, како на пример Деловната коалиција за укинување на DOMA, чии членови доаѓаат од Marriott International Inc, Aetna Inc, eBay Inc и Thomson Reuters Corp, корпорацискиот дел од новинската агенција Ројтерс.
Поединечно, неколку конзервативни судии го критикуваа Обама и Одделот за правда, заради тоа што не го бранеле законот за бракови по судски пат.
Врховниот судија Џон Робертс ги доведе во прашање ставовите на Обама, кој го применува DOMA истовремено нарекувајќи го невалиден.
