ЛГБТ луѓето во Тунис секојдневно се среќаваат со потешкотии поради својата сексуална ориентација и родов идентитет. Според актуелното кривично право во Тунис, хомосексуалноста е илегална и казнива. Со цел да научиме повеќе за статусот на ЛГБТ луѓето во Туниското општество и за нивните секојдневни животи, поразговаравме со Кулу Махдхаури, активистка за човекови права од Тунис.
lgbt-prava.ba: Дали можете да ни дадете кратко резиме на животот на ЛГБТ лицата во Тунис?
Во Тунис, хомосексуалноста е криминализирана и истата се санкционира со три години казна затвор. Животот на ЛГБТ лицата е секојдневна борба. Покрај законот, ЛГБТ лицата се соочуваат и со осуда од страна на општествениот морал, религијата и традициите. Аналните тестови се стандардна практика помеѓу полицијата и докторите за откривање на геј мажите, додека лезбејките се подложуваат на лекување преку принудни бракови и преку корективни и колективни силувања кои се вообичаени и најчесто се организирани од страна на нивните семејства. Апсењата често се придружени со сексуално вознемирување и силување. Доколку би сакале да сумираме, би можеле да речеме дека во Тунис, хомофобијата е закон.
lgbt-prava.ba: Можете ли да ни кажете дали статусот на ЛГБТ лицата во Тунис се промени по Арапската пролет? Како општеството ги третира ЛГБТ луѓето?
Многу нешта се променија по Арапската пролет. Сега исламистите се во подем и поради тоа, исламизацијата на политиката и на јавниот живот на улиците во Тунис е многу висока. Овој нов религиозен контекст, поврзан со отсуството на дефинитивна влада, како и со отсуството на формален устав, создава една непријателска атмосфера, премногу напната и неподнослива за ЛГБТ заедницата. Така, наидуваме на едно големо опаѓање на квалитетот на живот, кој и предходно беше непријатен, преку аутирање, арбитрерна ексклузија, злосторства од омраза, напади и повици на убиства од страна на политички и религиозни фигури. Лицата кои се јавно аут, ја имаат напуштено земјата или живеат во Тунис и на друго место. Трансродовите лица живеат сокриени и под постојан терор.
lgbt-prava.ba: Дали во Тунис хомосексуалноста е се уште криминализирана и каква е разликата помеѓу општествениот и правниот третман на лезбејките и на геј мажите?
Откога беше напишан новиот Устав, хомосексуалноста е криминализирана. Мислам дека од страна на полицијата, геј мажите страдаат повеќе од лезбејките само поради тоа што полицијата ги изложува на анални тестирања за да ги докаже нивните сексуални практики. Што се однесува до лезбејките, тие (полицијата) не можат да докажат ништо, се додека не ги фатат in flagrante delicto, или да ги затекнат во поседување на фотографии или видеа кои можат да ги инкриминираат. Што се однесува пак до трансродовите лица, нивните тела се доволни за тие да бидат сопрени и осудени.
lgbt-prava.ba: Како ЛГБТ лицата се прифатени или санкционирани од страна на нивните семејства?
Се разбира дека има некои семејства кои ги прифаќаат своите деца со нивните разлики, но тие се многу ретки и воглавно се обидуваат да ги натераат своите деца да ја напуштат државата. Според огромното мнозинство, да се има геј дете е клетва, срам за детето, но и срам за целото семејство, за семејната чест. На геј мажите вообичаено им се закануваат со смрт и мошне млади завршуваат на улиците, или пак се принудени да ја играат играта и да се кријат, да лажат и да се фрустрираат. Што се однесува до лезбејките, се додека не се докаже нивната сексуална ориентација, нема да имаат никаков проблем, дури и оние кои се маженствени. Ние живееме во патријархално и сексистичко општество, каде жената е слаба затоа што ’е жена’, и доколку таа сака да изгледа како силен маж (бидејќи, како што ни е познато, ’сите мажи се силни!!!’), тоа е сосема нормално. А оние пак кои биле аутирани, или пак кои самите излегле во јавност, се затворани, присилно омажени, а понекогаш за да бидат корегирани и излечени, жените се силувани од страна на повеќе мажи.
lgbt-prava.ba: Дали можете да ни кажете повеќе за вашата организација, за вашата работа и за активностите кои ги преземате за да го промовирате почитувањето и заштитата на ЛГБТ правата и со кои потешкотии и ризици се соочувате во вашето секојдневно работење?
Мојата организација ’Chouf’ (преведено значи ’Стража’) е група која има хоризонтална структура. Ние сме воглавно жени, лезбејки или бисексуалки, и работиме на различни планови и полиња. Се обидуваме да ги искористиме нашите професионални активности за да ја збогатиме организацијата. Некои од нас се адвокатки, па со нив се соочуваме со и работиме на правните рамки. Други се новинарки, па со нив се обидуваме да ги едуцираме медиумите. Организираме работилници чија цел е подигање на свеста за личните слободи и нудиме правна и/или психолошка подршка за луѓе кои се соочуваат со хомофобија. Ние немаме донатори, самите ги финансираме своите активности, што во голема мера ја ограничува нашата работа, но успеваме бидејќи навистина веруваме во тоа што го работиме.
lgbt-prava.ba: Дали можете да ни кажете повеќе за Вашиот документарен проект кој се однесува на животот на ЛГБТ луѓето во сите земји – членки на Регионалната мрежа?
Имаме документарен проект против хомофобијата и трансфобијата, кој вклучува 19 држави од регионалната мрежа. Тоа се Алжир, Тунис, Хрватска, Босна и Херцеговина, Србија, Црна Гора, Косово, Албанија, Грција, Турција, Ирак (од овие држави очекуваме одговор на барањата за виза), Иран, Азербејџан, Грузија, Ерменија и доколку имаме пари за билети, Палестина, Египет и Либан. Николас Силва и јас сме тимот кој работи на изготвувањето на документарецот за хомофобијата и за влијанието на политичките промени и религиозното лоби врз животот на ЛГБТ лицата. Ние сме самофинансирани; локалните организации ни помагаат со менаџирањето на активностите и логистичката подршка која ни е потребна за да ги пронајдеме лицата кои ги бараме за нашите интервјуа. За нас е многу значајно интервјуираните лица да се изразат на својот мајчин јазик, а нашата мрежа на пријатели ќе ни помогне со преводот. Исто така, подготвивме и изложба на фотографии која ќе биде поставена во поголемиот дел од државите кои ќе ги посетиме. Документарецот ќе биде снимен во периодот помеѓу Јули и Октомври и мислиме дека во Февруари ќе биде готов.
Извор: lgbt-prava.ba
