Естонија пред извесно време (09/10/14) стана првата бивша советска земја што ја гарантира брачната еднаквост за истополовите парови.
Со сооднос од мнозинството на пратеници кои гласаа ,,за‘‘ (40) наспроти пратениците кои гласаа ,,против‘‘ (38), изгласан е Законот за партнерство кој беше предложен од страна на Партијата за реформа и премиерот Тави Ројвас кој има 35 години и е најмладиот европски лидер.
Тоа значи дека од 2016 година, истополовите парови ќе ги имаат истите права како и хетеросексуалните парови во врска со наследувањето, здравствените права, посвојувањето на деца.
ЛГБТИ активистите во оваа земја, го поздравија законот и таквата политичка одлука.
,,Ова е мал светол зрак во Балтичкиот регион‘‘ вели Јурис Лавриковс, водачот на ИЛГА-Европа.
,,Естонскиот глас е многу значаен, затоа што Латвија го зема предвид примерот на Естонија, додека Литванија го зема примерот на Латвија во однос на општествениот развој‘‘ дополнува Лаврикос.
Зборувајќи за EUobserver, од конгрес за геј правата во Рига, потенцираше дека Латвија моментално се движи во обратна насока од онаа на Естонија.
Таму, во процедура се нови законски промени со кои ќе се ограничи сексуалното образование, вклучувајќи го и образованието од ЛГБТ областа. Латвиската влада исто така одбила да испрати официјални претставници на настан на ИЛГА-Европа.
На линија на противење на Законот за партнерства кој е изгласан во Естонија, била пратеничката Лиза Пакоста која тврди дека со таквото законско решение на паралелни регистри ќе настане правен хаос, како и тоа дека можноста за посвојување на деца од страна на истополови партнерства ќе значи децата се објекти на интересите на возрасните. Но таквите ставови, како што вели Пакоста – не се хомофобични.
Од општествената атмосфера во која со донесе таквиот Закон за партнерства во Естонија, значајно е да се истакне дека една американска евангелистичка група World Congress of Families, на иницијатива на Кремлин, организирала кампања со која хомосексуалноста се изедначувала со педофилијата.
,,Забележуваме како овие сили стануваат се‘ повеќе и повеќе организирани‘‘ изјави Лавриковс во врска со ова.
,,Начинот на кој аргументираа пратениците во парламентот, кои воедно се и предлагачи на законот, беше многу парадигматичен. Тие се држеа до нивните принципи, наместо да потпаѓаат на манипулацијата и црната пропаганда, односно да аргументираат од позиција на жртви‘‘ дополнува Лавриковс.
Конечно, пратеничката Пакоста истакнала дека ЛГБТИ активистите ,,ја пречекориле линијата‘‘, само затоа што наспроти нејзиниот политички ангажман, таа живеела во нерегистрирана заедница со нејзиниот партнер и деца.
Извор: http://euobserver.com
