Андоновски: ЛГБТИ заедицата нема пристап до мејнстрим медиумите

Невладината организација ,,Цивил‘‘ и Фондацијата ,,Фридрих Еберт‘‘ – канцеларијата во Скопје ја организираа дискусијата на тема „Слобода на говор и медиуми во Македонија: Предизвици и решенија“ во среда, 15 октомври, во ГЕМ Клуб (Скопје, Стара Чаршија). Специјален гостин на овој настан беше г. Кристијан Мир, Извршен директор на Репортери без граници Германија. 

На оваа дискусија, програмскиот директор на ЛГБТИ Центарот за поддршка Кочо Андоновски имаше излагање и интегралниот текст од истото ќе биде пренесен во продолжение.

,,Јас би споделил едно искуство кое ни се случува во моментот, а тоа се уставните промени. Ние како ЛГБТИ заедница немаме пристап до мејстрим медиумите, инаку мене одамна ми имаат кажано новинари дека сум на црна листа, не знам кој ги прави тие црни листи, па одлучивме да отидеме на локалните медиуми. Ние немавме јавна дебата, никакви информации, а Устав менуваме. Еднаш кога во Собранието имаше јавна расправа тогаш известија мејстрим медиумите, инаку тоа не постои.

Договоривме десет интервјуа кои ги спроведовме во три дена. Тоа, очигледно, беше доволно време да се прошири веста и веќе четвртиот ден да немаме пристап до ниеден локален медиум. Прилеп излезе Њујорк, ни кажаа дека немаат до ноември ни пет минути слободни во програмата. Од КТВ Кавадарци кога им се јавивме рекоа: Ние не подржуваме обратни, ако сака Кочо да излезе и да збори како што збори Владата, може, ако не, не може.
Го споделив ова искуство од пред една недела само за да покажам дека ова е ситуацијата во Македонија. За Уставните измени на локално ниво ни новинарите не знаеја, а не обичниот граѓанин. Тие не знаат дека се менува Уставот. За какво информирање ние зборуваме?

Она што е многу важно да го направиме во наредниот период, а и меѓународната заедници исто, е да се спроведе законот за граѓанско присуство во регулаторното тело и во јавниот сервис.‘‘