Комисијата за заштита од дискриминација се изјасни: ИМА ВОЗНЕМИРУВАЊЕ ПО ОСНОВ НА СЕКСУАЛНА ОРИЕНТАЦИЈА ВО УНИВЕРЗИТЕТСКИТЕ УЧЕБНИЦИ

Комисијата за заштита од дискриминација на РМ се произнесе по претставката на Мрежата за заштита од дискриминација за вознемирување, односно дискриминација по основ на сексуална ориентација во учебниците „Медицинска психологија“, „Психијатрија – 1“ и „Психијатрија – 2“, кои се користат на Универзитетот св.Кирил и Методиј од Скопје. Во своето Мислење од 24.04.2014 година, КЗД изјавува дека има вознемирување по основ на сексуална ориентација во спорните учебници.

Оваа одлука на Комисијата е резултат на долгата постапка која започна на 23.10.2013 година, кога Мрежата за заштита од дискриминација поднесе претставка до КЗД против Ректорот на Универзитетот и авторите на учебниците. Речиси пет месеци одкако од нив беше побарано да се произнесат, авторите на учебниците се извинија за „настанатите грешки во посочените текстови“. Се извинија сите, со исклучок на еден автор.

Само со ваков начин на постапување и одлучување, Комисијата за заштита од дискриминација може заслужено да се вброи во Европската мрежа на тела за еднаквост и ЛГБТИ Центарот за поддршка ја поздравува оваа одлука. Комисијата и НВО секторот во Македонија кој работи со ЛГБТИ прашања мораат да продолжат да ја унапредуваат и продлабочуваат меѓусебната соработка и комуникација. Само на таков начин можеме да се надеваме дека во Македонија ќе се постави практика на отстранување на дискриминацијата од секојдневието на ЛГБТИ луѓето во нашето општество и само така можеме да се надеваме дека различните ќе бидат прифатени, а дискриминираните заштитени.