Палиаре: Разочаран сум од првите луѓе на државата

Проследете го интервјуто на „НОВА‘‘со претседателот на Друштвото на македонските канадски правници (МЦЛА), Крис Палиаре за неговата разочараност од првите луѓе во државата, за ставот на дијаспората во врска со почитувањето на човековите права во Македонија и молкот на Јавниот обвинител и институциите околу нападот врз припадници и поддржувачи на ЛГБТ заедницата и активисти за човекови права. 

На 29 октомври 2014 година, врвниот канадски правник и претседател на Друштвото на македонските канадски правници (МЦЛА), Крис Г. Палиаре О.Онт. испрати писмо до претседателот на Република Македонија Ѓорге Иванов и премиерот Никола Груевски, изразувајќи силно противење на предложениот уставен амандман XXXIII, со кој ќе се забранат истополовите бракови, како и воведување забрана за граѓански заедници или било која друга форма на животно партнерство за истополовите партнери.  

Крис Палиаре е канадски адвокат, со македонско потекло, и низ својот професионален ангажман е познат како пионер во водењето на литигациски случаи. Неговата способност за посебно комбинирање на правните лекови, стратешкиот инстинкт, како и креативноста му го обезбедиле врвното место помеѓу адвокатите во државата Онтарио, Канада. Афирмирањето на Палиаре е застапено како помеѓу канадските граѓани, така и помеѓу македонските граѓани кои живеат во Канада. Така, на 20 септември 2014 година, Палиаре ја доби наградата за животно остварување од страна на Обединетата македонска дијаспора (Канада), за време на одржувањето на Macedonian Tribute Ball во Торонто во центарот Мариот Итон, каде што присуствувале околу 450 гости.  

До денес, ниту претседателот Иванов ниту премиерот Груевски не одговорија на ова барање, ниту на писмото.

Видео запис: novatv.mk