Претседателот на САД, Барак Обама, ја одбра поранешната светска шампионка во тенис, Били Жан Кинг, за која е јавно познато дека е лезбејка, да ја претставува делегацијата на САД за време на церемониите за отворање и затворање на Олимпијадата во Сочи, Русија.
Оваа одлука е директна порака до рускиот претседател Владимир Путин, кој стигна до насловните страници насекаде низ светот поради спроведувањето на анти-геј закони преку неговата забрана за „хомосексуалната пропаганда“.
Обама го објави ова на 16ти декември, и иако формално не реферираше на анти-геј политиките на Русија, портпарол на Белата Куќа изјави дека изборот на луѓето во делегацијата се прави за да се претстави разноликоста.
„[Делегацијата] ја претставува разноликоста на САД“ изјави Шин Инује. Тој додаде дека „[Претседателот] знае дека на светот ќе му го прикажат најдоброто од Америка – разноликост, детерминираност и тимска работа“, јавува ESPN.
Освен Кинг, уште една спортистка за која е јавно познато дека е лезбејка, хокеарката Кејтлин Кахоу, исто така ќе ги претставува САД во церемониите на затворањето на Олимпијадата.
70-годишната Кинг, која е американска икона, има освоено 39 Гренд Слем титули, вклучително 12 сингл, 16 во парови и 11 мешани двојки.
Иако никогаш не се натпреварувала на Олимписките игри, таа секако е достојна да ги претставува САД, особено во оваа контроверзна година.
Портпаролот на Human Rights Campaign, Мајкл Кол-Шварц, претходно имал испратено писмо до Претседателот Обама, барајќи тој да одбере спортист/ка кој/а е геј или лезбејка, за да ја претставува делегацијата. „Добар знак е во делегацијата да се видат претставници кои се отворено геј“, рече Кол-Шварц. Тој додаде, „Се надеваме дека ова ќе испрати порака до русите и остатокот од светот, дека САД ги цени граѓанските и човекови права на ЛГБТ луѓето.“
Иако Обама ја праќа Кинг во Русија, самиот тој нема да присуствува на Игрите; нема да присуствува ниту Првата дама или некој од поранешните претседатели, што би било првпат од 2000 сегашниот или некој од претходните претседатели на САД да не присуствува на Олимпијадата. Од Белата Куќа изјација дека распоредот на обврските на Обама ќе го оневозможи неговото присуство.
Францускиот претседател Франсоа Оланд и германскиот претседател Јоаким Гаук исто така нема да бидат присутни на Игрите.
Кинг, која е добро информирана за анти-геј случувањата во Русија, го даде своето мислење за ситуацијата во интервју за USAToday.
„Понекогаш мислам дека ни треба момент како со Џон Карлос,“ рече Кинг, мислејќи на Олимпиецот во трчање кој беше исфрлен од Олимпијадата во Мексико Сити во 1968 затоа што протестирашто против расизмот. Кинг изјави дека е „длабоко почестена“ што е дел од делегацијата.
„Исто толку и ми е мило да застанам со луѓето од ЛГБТ заедницата во поддршка на сите спортисти кои ќе се натпреваруваат во Сочи и се надевам дека овие Олимписки игри навистина ќе бидат настан со солзи-радосници за универзалното прифаќање на сите луѓе“, изјави Кинг за ESPN.
Иако Кинг нема да се натпреварува на Олимпијадата, самото присуство на оваа икона на еднаквоста ќе испрати важна порака, која не може да помине незабележана од Русија или остатокот од светот.
