Уште една основана жалба до Советот за етика во Медиумите на Македонија

ЛГБТИ Центарот за поддршка, Хелсиншкиот комитет за човекови права на Република Македонија и Коалицијата “Сексуални и здравствени права на маргинализирани заедници” реагираа на текстот со наслов „ЛГБТИ заедницата Организатор на Протестите пред уставен заедно со СДСМ и СОРОС“, објавен на 16.03.2016 година, во 10 часот и 23 минути, на интернет порталот Пулс 24 (www.puls24.mk), со жалба до Советот за етика во медиумите на Македонија (СЕММ). Комисијата за жалби при СЕММ одлучи дека жалбата е основан, при што Кодексот на новинарите на Македонија е прекршен во членовите 1, 10, 13 и 14.

Главниот дел од жалбата е насочен кон тоа дека „текстот изобилува со дискриминација и говор на омраза кон ЛГБТИ заедницата, претставувајйи ја истата како „закана за традиционалните македонски вредности и како заедница која се стреми кон рушење на државата, односно државниот и уставниот поредок”.

Во образложението, покрај посочувањето на тоа како се повредени горно-наведените членови од Кодексот на новинарите на Македонија, се посочува и дека „Извршната канцеларија на СЕММ, во согласност со член 12 од Деловникот на Комисијата за жалби, по приемот и разгледување на жалбата, стапи во контакт со Интернет порталот Пулс24, со барање уредничкиот колегиум да се изјасни по однос на наводите од жалбата. Наведениот интернет портал не достави одговор на наводите на жалителот.“  

Ова позитивна одлука по поднесени жалби до СЕММ е трета по ред, и по тој повод уште еднаш ја поздравуваме работата на Комисијата за жалби, имајќи ги предвид одбраната на медиумските стандарди, но и принципите на еднаквост и дискриминација кои треба да бидат подеднакво гарантирани за сите општествени групи и за нивната репрезентација во медиумскиот простор.