Советот на Европа усвои историска резолуција за трансродовите лица

Неодамна, парламентарното собрание при Советот на Европа со големо мнозинство, ја усвои резолуцијата за човекови права на транс лицата. Ова резолуција претпоставува нејзино почитување од страна на земјите-членки на Европската Унија, односно овие земји според резолуцијата треба да ги гарантираат и остваруваат правата на заштита од дискриминација на транс лицата, како и да обезбедат брза и транспарентна правна процедура за промената на полото во документите за лична идентификација врз основа на самоопределувањето на лицето.

Во периодот од 2013 година па натаму, Комитетот за еднаквост и недискриминација неколку пати го разгледуваше прашањето за транс лицата. Организацијата Transgender Europe, доследно го следеше овој процес и оствари плодна комуникација со Комитетот, така што имаше голем придонес во позитивниот исход за транс лицата на европско тло. Во рамки на овој настан, следуваа и моќни сведоштва од страна на активисти од Украина, Турција, Франција, Литванија и Ирска, со цел да ги информираат европските делегати за секојдневните животи на транс лицата. Тие апелираа до парламентарците да ја поддржат резолуцијата, која претставува витален исчекор кон подобрување на животните услови за транс лицата на целиот континент.