Соопштение за јавност – Средба со известувачот на Европскиот Парламент за Република Македонија, г-н Ричард Ховит

Специјалниот известувач на Европскиот Парламент за Република Македонија, г-н Ричард Ховит остро го осуди анти-ЛГБТИ насилството во Македонија на средбата која на 29.10.2013 година во 12:00 часот беше одржана во ЛГБТИ Центарот за поддршка помеѓу делегацијата на ЕП и претставници од Хелсиншкиот Комитет за човекови права на РМ и ЛГБТИ Центарот за поддршка.

Известувачот на ЕП за РМ, г-н Ховит, на средбата ја нагласи поддршката од Европската Унија за правата на ЛГБТИ луѓето и изрази жалење за зголеменото насилство мотивирано од омраза кон ЛГБТИ луѓето во РМ. Исто така, говореше за политиките на ЕУ во однос на уживањето на фундаменталните човекови права и еднаквоста на граѓаните пред законите, а воедно ја напомена и  должноста на државите за заштита на сите свои граѓани без селективен пристап.

На средбата, г-нот Ховит беше известен за немањето напредок во истрагата за четири од пет напади врз ЛГБТИ Центарот за поддршка, иако првиот напад се случи пред точно една година. Се дискутираше и за  институционалниот молк и воопшто недостатокот од дијалог за заканите и злосторствата сторени од омраза врз основа на сексуална ориентација и родов идентитет, чија стапка драстично се зголемува. Недостатокот од јавна осуда од надлежните институции  кои се должни да ги штитат сите свои граѓани без дискриминација, како и ниската стапка на поведување на судски постапки по случаи на анти-ЛГБТИ насилство, укажува на тоа дека анти-ЛГБТИ насилството во Република Македонија не само што се толерира, туку и се охрабрува.

По одржувањето на оваа средба, нашите очекувања се дека г-нот Ховит ќе ги поттикне државните институции да ги преземат соодветните мерки за расветлување и докажување на нападите врз ЛГБТИ Центарот за поддршка, како и откривање, пронаоѓање и казнување на сторителите и сузбивање и превенција на анти-ЛГБТИ насилството во целост. Само на тој начин, Република Македонија заедно со Европската Унија може да ги промовира толеранцијата, слободниот пристап до правда и прифаќањето на различностите во општеството, ослободено од насилство.