Во продолжение, го пренесуваме интегралниот текст од реакцијата и барањата на меѓународната фондација за заштита на човековите права Front Line Defenders, во врска со инцидентот на роденденската прослава на ЛГБТИ Центарот за поддршка во ,,Дамар‘‘ на 23. 10. 14 година.
Напад на прославата на ЛГБТИ Центарот за поддршка
На 23 октомври 2014 година, група од околу 30 мажи го нападнала објектот во кој ЛГБТИ Центарот за поддршка одржувал прослава по повод двегодишнината од своето постоење.
Во 21:30 часот на 23 октомври 2014 година, околу 30 лица маскирани со качулки на главите влегле во кафе барот Дамар и започнале да фрлаат предмети и стаклени шишиња врз групата и да извикуваат навреди, по што избегале. Во времето кога се случил инцидентот, повеќе од 60 лица биле присутни на прославата. Две лица кои за време на инцидентот стоеле на влезот пред кафе барот биле нападнати со стаклени шишиња и се здобиле со повреди. Неколкумина од гостите кои се наоѓале во внатрешноста на објектот се здобиле со мали исеченици од разлетано стакло. Според присутните, се работи за добро координиран и планиран напад.
ЛГБТИ Центарот за поддршка е проект на Хелсиншкиот комитет за човекови права на Поранешна Југословенска Република Македонија, кој се залага за подобрување на правата на ЛГБТИ лицата преку посредување, бесплатна правна помош, подигање на свеста и координација на групите за поддршка.
Во текот на своето двегодишно постоење од основањето во октомври 2012 година, ЛГБТИ Центарот бил предмет на напади во шест наврати, од кои три каменувања и три обиди за палење на канцелариите на Центарот. Истрагата за овие напади наводно е во тек. ЛГБТИ Центарот за поддршка и Фронт лајн дефендерс (Front Line Defenders) во 2013 година започнаа национална радио кампања за заштита на правата на ЛГБТИ поддржувачите.
Според известувањата на медиумите, владејачката ВМРО-ДПМНЕ јавно го осудила нападот.
Фронт лајн дефендерс изразуваат загриженост за последниот напад врз ЛГБТИ Центарот, кој е директно поврзан со активностите за унапредување и заштита на правата на ЛГБТИ лицата.
Фронт лајн дефендерсги повикуваат македонските власти:
- Да спроведат итна, детална и непристрасна истрага за нападот и да ја информираат јавноста за резултатите од истата, како и да ги казнат сторителите во согласност со меѓународните стандарди;
- Да ги преземат сите неопходни мерки за гаранција на физичкиот и психолошкиот интегритет и безбедноста на бранителите на правата на ЛГБТИ лицата во ПЈР Македонија;
- Да преземат трајни мерки за поттикнување на јавно признавање на важната улога која ја имаат бранителите на човековите права, вклучувајќи ги бранителите на ЛГБТИ правата, и да се борат против непријателството и предрасудите против нив;
- Во сите услови да гарантираат дека бранителите на ЛГБТИ правата во ПЈР Македонија ќе можат да ги спроведуваат нивните легитимни активности без какви било ограничувања и без страв од одмазда.
