Денес во Собранието на Република Македонија, беше одржана јавна дискусија за уставните амандмани. Пред повторно да бидат вратени во Собранието како предлог-амандмани на Уставот, Владата како предлагач има опција да вгради дел од забелешките изнесени на јавните расправи. Потоа, поединечно за секој предлог-амандман Собранието на седница треба да гласа со двотретинско мнозинство.
Процедурата за носење на уставните измени се очекува да заврши до средината на октомври.
Предлог-амандманите се однесуваа на дефинирање на бракот како заедница меѓу маж и жена, прецизирање на фискалните правила во рамките на буџетот и тоа за буџетскиот дефицит и јавниот долг, промена на називот на Народната банка на Република Македонија, воведување на институтот Уставна жалба, промена на составот на Судскиот совет, промена на надлежноста за одлучување по жалба на одлуките на Судскиот совет за избор на судии, разрешување или друга изречена дисциплинска санкција на судија или на претседател на суд и воведување надлежност за одлучување по жалба на одлуките на Советот на јавни обвинители за избор на јавни обвинители, разрешување или друга изречена дисциплинска санкција на јавен обвинител од страна на Уставниот суд, создавање на Уставна можност за формирање на финансиска зона, пристапување кон измени на Уставот, со цел дефинирање на Државниот завод за ревизија како уставна категорија.
Од страна на тимот на ЛГБТИ Центарот за поддршка, подетално беше проследен Амандманот 33 со кој уставно се дефинира брачната и вонбрачната заедница како заедница помеѓу еден маж и една жена.
На оваа јавна расправа, програмскиот директор на ЛГБТИ Центарот за поддршка, Кочо Андоновски истакна: ,,Европскиот преседан на уставно дефинирање на вонбрачната заедница како животна заедница исклучиво помеѓу еден маж и една жена, како и последиците кои ваквото дефинирање на бракот и вонбрачната заедница ќе го имаат врз правото на семеен живот се во колизија со ратификувани меѓународни документи кои се дел од националниот правен систем на РМ и кои имаат повисоко правно дејство од националното законодавство.‘‘
Тука особено треба да се земат предвид член 8 од Европската конвенција за човекови права и Препораките на Советот на Европа кои се однесуваат на почитувањето на правото на приватност и семеен живот. На овој начин, Законодавецот е во опасност да создаде длабока контрадикторност и практичен судир помеѓу уставните одредби и одредбите од ратификуваните меѓународни документи.
Во своето обраќање, г-нот. Андоновски солидарно предочи дека: ,,Со право се плашат моите пријатели од овие измени, затоа што никој од нас не знае што понатаму ќе се случува. Не знаете ниту вие, а треба да изгласате измени на највисокиот акт во нашата држава. Ваквото кршење на правата на луѓето ги препознава и Судот за човекови права во Стразбур, Венецијанската Комисија, Советот на Европа и така натаму.‘‘
Тој заврши со изрази на надеж дека: ,,Се надевам дека ќе се потпрете на нашето и меѓунрадоното право и ќе гласате согласно сопствената совест за заштита на сите граѓани, што е и улогата на Уставот, и нема да дозволите манипулативно да изгласате Амандман кој ќе се коси со меѓунардното право, човечноста, а ќе има и далекусежни последици по нашето општество и целите на нашата заедничка држава.‘‘
На јавната дискусија за уставните измени, извршната директорка на Хелсиншкиот комитет за човекови права на РМ, Уранија Пировска ја проблематизираше процедурата на уставни измени: ,,За вонбрачната заедница дознавме дури на 25 јули кога Владата го достави предлог-амандманот, откако претходно амандманот беше изгласан со двотретинско мнозинство. Гледам дека дел од пратениците се чувствуваат изманипулирани, но не станува само збор за пратениците туку и за граѓананите кои се изманипулирани. Во образложението зошто се дефинира бракот во Уставот се вели дека тоа се прави за „да се зачува бракот како институција“, па ми се поставува логично прашање, ако вие сакате да го заштитите бракот како институција зошто ја воведувате вонбрачната заедница во Уставот?‘‘
Пратеничката од партијата Демократска обнова на Македонија, Лилјана Поповска во врска со неприфатливоста на Амандманот 33 и делот на дефинирање на вонбрачната заедница кој првично не беше составен дел на предлог-амандманот 33 потенцираше дека: ,,Јас ќе поднесам амандман за да се избрише додавката и да се врати првата дефиниција. Ако се инсистира на овој и ваков амндман, тогаш нема да можам да го поддржам, зошто не смееме ништо и никого да дискриминираме, ни свесно ни несвесно.‘‘
Видео записите се користени од: http://a1on.mk
