Правата на ЛГБТИ луѓето во Заклучните согледувања на Комитетот за економски, социјални и културни права

Комитетот за економски, социјални и културни права при  Организацијата на обединетите нации, ги објави Заклучните согледувања по разгледувањето на третиот периодичен извештај на државата на 58-та седница од јуни 2016.

Комитетот и’ упати на Република Македонија 30 препораки, од кои 25 за низа суштински права и прашања. Mеѓу останатото, тие се однесуваат на пописот и податоци, децентрализацијата, Народниот правобранител, правна помош, корупција и не-дискриминација. Препораки се упатени и за состојбата на мигрантите, барателите на азил и бегалците, Ромите, ЛГБТИ лицата и еднаквоста помеѓу мажите и жените како и за одредени прашања од областа на невработеноста, минималната плата, синдикалните права, правото на социјална заштита, пристапот до здравствена заштита и сексуално и репродуктивно здравје, домашно насилство, сиромаштија и правото на образование.

Од аспект на состојбите со правата и слободите на ЛГБТИ луѓето во Македонија, Комитетот препорачува државата да преземе мерки за дискриминацијата врз основа на сексуална ориентација и родов идентитет експлицитно да биде забранета во законите за анти-дискриминација, и истполовите парови да имаат пристап до привилегиите кои се резервирани за венчаните парови; да се искоренат негативните стереотипи за како и стигматизацијата на ЛГБТИ луѓето, преку ревизија на учебници и кампањи за подигнување на свесноста кај јавноста, здравствените работници, социјалните работници и спроведувачите на законите и останатите јавни службеници; да се обезбеди точна, непристрасна и ефективна истрага и разрешување на случаите на насилство врз ЛГБТИ луѓето.

Во заклучните согледувања на Комитетот, изразена е и грижа за тоа дека Законот за спречување и заштита од дискриминација од 2010 година не ги вклучува сексуалната ориентација и родовиот идентитет како основи за дискриминација, како и тоа што член 14(6) од Законот и понатаму дискриминира помеѓу партнерствата од различен пол, на кои им припаѓа концептот за семејство, и истополовите партнерствса. Исто така, Комитетот искажува загриженост дека постојат универзитетски учебници кои ги зацврстуваат негативните стереотипи против лезбејките, геј, бисексуалните, трансродовите и интерсекс луѓето. Понатаму, загриженоста се однесува и на фактот што ЛГБТИ луѓето се малтретираат психички и физички, социјално се стигматизираат и дискриминираат а спроведувачите на законите не секогаш постапуваат по случаи на насилство врз ЛГБТИ луѓето.