ПЕТ медали за македонските спортисти на геј игрите во Охајо

Македонските спортисти беа повеќе од забележителни на 9-тите Геј игри (Gay Games 9/GG9), кои претставуваат меѓународен спортски и културен настан, кој се одржува на секои четири години. Оваа година, Kливленд и Акрон, Охајо во Соединетите Американски Држави беа домаќини на игрите, кои се одржаа од 9-ти до 16-ти август и на кои учествуваа спортисти од повеќе од 70 земји. Вообичаено, околу 10% од учесниците не се ЛГБТ, или најчесто пријатели и членови на семејства кои учествуваат со цел да ја изразат својата поддршка.

Македонските спортисти, поддржани од Pink Support Mk на Геј игрите освоија пет медали, од кои две златни, две сребрени и една бронзена, освојувајќи ги срцата на бројните навивачи. Но, тоа што ги прави овие игри посебно интересни за нас, е тоа дека ангажманот на македонските спортисти не заврши на терените. Имено, предводничката на македонскиот тим, Мариа ДиБиаџио ги дизајнираше дресовите за натпреварувачите на игрите, кои беа донација од нејзината модна куќа за дизајнирање на спортска облека, DiBiaggio New York.

Pink Support Mk е организација која ја поддржува интеграцијата на маргинализираните групи во македонскиот општествен живот, преку нивна инклузија во спортски, социјални и образовни активности во државата.