Промоција на видео спотот „За нација без дискриминација“

Утре во ЕУ Инфо Центарот (17 ноември, 2015 година), во 10:00 часот ќе се одржи промоција на видео спотот „За нација без дискриминација“.

Настанот е во организација и соработка на Комисијата за заштита од дискриминација, Х.Е.Р.А. – Асоцијација за здравствена едукација и истражување и Коалицијата „Сексуални и здравствени права на маргинализираните заедници“.

На овој настан ќе се промовира видео спотот „За нација без дискриминација“, како дел од кампањата чија цел е подигање на свеста кај граѓаните и намалување на дискриминацијата по различни основи, особено на менување на сликата која со години е создавана за лицата со различна сексуална ориентација.

Покрај тоа, ќе бидат презентирани и реализираните активности и постигнатите резултати од страна на Комисијата за заштита од дискриминација во текот на 2015 година во рамките на проектот „Зајакнување на владеењето на правото за заедницата на ЛГБТ граѓани“ – во соработка со Х.Е.Р.А. – Асоцијација за здравствена едукација и истражување и Коалицијата „Сексуални и здравствени права на маргинализираните заедници“, а поддржан од Амбасадата на Кралството Холандија.