Олимпиецот Том Дејли излезе од плакарот

Олимпискиот нуркач Том Дејли направи јавно “излегување од плакарот” со објавување на видео на YouTube. 19 годишниот атлет од Британија во 5 минутниот клип, кој само за неколку часа постигна гледаност од милион, раскажува отворено за својата врска со маж.

“Од изминатата пролет ми се смени животот, драстично, запознав некој кој ме прави многу среќен и кој прави да се чувствувам многу сигурно и тој некој е маж.” објаснува Дејли во видеото.

“Секако дека уште ми се допаѓаат девојки, но во овој момент сум во врска со момче и не можам да бидам посреќен од ова,” додава тој. “Се чувствувам заштитено и се чувствувам добро.”

Дејли го објави видеото на на својот твитер профил каде што има 2,5 милиони следбеници.

Тој вели дека решил да ја сподели веста откако бил погрешно протолкуван во интервју порано годинава. Исто така зборува за неговиот татко кој починал од рак во 2011 година и  како неговото семејство и пријателите реагирале на новостите.

Дејли освои бронзен медал во неговата категорија во летните игри 2012 во Лондон. Најголема слава во Англија стекна со квалификацијата за Олимписките игри во Пекинг 2008 година, на свои 14 години.

Еве го толку зборуваното видео.