Посета на студентите од Факултетот за безбедност – Скопје на ЛГБТИ Центарот за поддршка

По иницијатива на Факултетот за безбедност – Скопје, а во склоп на екстра-курикуларните активности по предметот Недискриминација и ранливи групи, дел од студентите го посетија ЛГБТИ Центарот за поддршка.

Со посредство на проф. д-р. Стојанка Мирчева, посетата беше остварена со цел подобро запознавање на работата на Центарот, но и обрнување на внимание на општата политичка констелација и ЛГБТИ луѓето. Оттука, беа опфатени човековите права на ЛГБТИ луѓето, како и нивната позиционираност во меѓународна и национална рамка.

Имајќи предвид дека голем дел од случаите кои биле пријавени, и за кои била пружена помош од страна на Центарот, се однесуваат на полициското постапување, средбата беше од голема корист за студентите и за тимот на Центарот. Особено потсетувајќи се на низата соработки кои ги имал Факултетот за безбедност – Скопје со организации кои работат во областа на човековите права на ЛГБТИ луѓето.  

Поголем дел од дискусијата беше насочена кон предизвиците и проблемите кои се јавуваат во работата на Центарот, а се поврзани со полициското постапување, како и со повредите на права на ЛГБТИ луѓето како чести случаи во контакт со припадниците на безбедносните служби. Во таа насока, студентите од Факултетот за безбедност – Скопје искажаа голем интерес за подобрување на состојбите, така што се отворија низа прашања кои беа дискутирани, а беа од голема полза за подобра информираност и едукација. 

Ја поздравуваме иницијативата на Факултетот за безбедност – Скопје, како и нивниот интерес за средба и ја охрабруваме понатамошната соработка.