Комесарот за човекови права на Советот на Европа ја поддржува кампањата за правата на трансродовите лица: „Ова е многу потребна алатка“

„Транс луѓето во Европа и понатаму се соочуваат со сериозни пречки за целосното уживање на нивните човекови права. Дискриминацијата, трансфобичните злосторства од омраза и нехуманите услови за правно признавање на родот се пречки за целосното вклучување на транс луѓето во општеството.

Кампањата на Transgender Europe, „Пристап до сите области! Признавањето ги отвора вратите“ нуди неопходни алатки за менување на ситуацијата. Таа е наменета за употреба од страна на надлежните и активистите, со цел да го заштитат достоинството на луѓето во секој чекор од животот.“

Нилс Муижниекс

Комесар за човекови права на Советот на Европа

Прочитајте повеќе за кампањата и симнете ги материјалите овде.

Во меѓувреме, владата на Данска предложи реформа на законодавството во однос на промената на полот во документите. Работна група составена од претставници од повеќе министерства работеше повеќе од една година и напиша извештај со анализа и можни модели за новиот, ревидиран закон:

1)      Моделот на изјава, каде лицето аплицира за промена на полот во документите, со изјава дека се чувствува како припадник на другиот пол.

2)      Моделот на проценка, каде проценката од психијатар е потребна за да се добие пристап до промена на полот во документите.

3)      Моделот на дијагноза, каде е потребна дијагноза за транссексуалност од националната клиника за сексологија.

4)      Модел кој вклучува и третман, каде барателот треба да има дијагноза и да биде на хормонска терапија најмалку една година.

По разгледувањето на извештајот, владата одлучи да го прифати првиот модел, моделот на изјава, и сега се работи на предлог-закон. Според истиот, барателот може да бара промена на полот во документите давајќи изјава дека неговиот/нејзиниот род е спротивен на полот наведен во документите. Апликацијата мора да се одобри по 6 месеци, кога ќе биде извршена промената. Шесте месеци се период на осврт, со цел да се осигураат дека апликацијата не е производ на импулс и да го минимизираат ризикот од измама и злоупотреба.

ЛГБТ Данска е многу задоволна што избраниот модел е сосема одвоен од системот на здравствена заштита, а одлуката за промена на полот во документите е лична и индивидуална, во која фактички не се бара одобрување од ниедна институција.

Превземено од ILGA-EUROPE и TGEU.