Пред неколку недели, правев интервју со човек од нео-нацистичката сцена во Малезија. Целиот нивен концепт беше збунувачки, затоа што нацистичката идеологија налага омраза кон сите кои не се белци, а луѓето од Малезија обично не се белци. Сепак, строгата идеологија не е проблем во овој случај, така што нацистите од Малезија можат да продолжат со викањето „Sieg heil“ и да носат кукасти крстови и покрај тоа што не и’ припаѓаат на белата Ариевска раса, од причина што многу мразат имигранти, или нешто во тој стил.
Уште една нео-нацистичка група која не се замара со придржувањето кон насоките на Хитлер за тоа кого да мрази, се членовите на движењето на нео-нацистички, скинхед хомосексуалци во Русија. Ако добро се сеќавате на кој било учебник по историја, фирерот и неговите другарчиња од Третиот Рајх не ги сакале многу ниту Русите ниту хомосексуалците – приближно 100 илјади хомосексуалци биле уапсени меѓу 1933 и 1945, а од нив 5 до 15 илјади биле пратени да гнијат по концентрационите логори.
Слично на Малезијците, неважните историски детали како постојаното гонење и страшниот геноцид биле заборавени од страна на Русите. Првата таква група на која налетав беше Сојузот на геј патриоти од Русија (Gay Union of Patriots of Russia), чии членови се расфрлаат со теории за тоа како само геј луѓето можат да бидат вистински руски патриоти. Исто така дознав дека има група која се вика Геј Ариевски Национал-Социјалисти (Gay Aryan National-Socialists ) и уште една, Геј Ариевски Скинхедси (Gay Aryan Skinheads или GASH). Последнава некако најдобро звучи, па најдов еден нивни член, Балу, на vk.com – сајт кој е сличен на Фејсбук и кој е популарен во Русија, и малку си помуабетивме за нацистичката геј сцена во Русија.
Здраво Балу. Можеш ли да ни кажеш нешто повеќе за идеологијата на GASH?
Балу: Нашата идеологија се состои во тоа да ја исчистиме планетата од „валканите“ нации. Се бориме за чиста крв, бела кожа и силни и убави луѓе. Не прифаќаме бели момци и девојки кои се муваат со црнци. Одвратно е да се гледаат такви меѓурасни заедници. Зошто да го поминете животот со такви отпадници, кога постојат здрави бели момци?
Затоа што има здрави луѓе и од сите други раси. Знаеш, повеќето луѓе не го поврзуваат нацизмот со хомосексуалноста. Зошто е ова така?
Мислам дека ова се базира на стереотип и дека една од причините е што хетеросексуалците биле доминантни во нацистичкото движење. Исто така, јавноста ги нарекува националистите варвари, убијци итн., така што набљудувачите најверојатно мислат дека националистите мораат да бидат силни и бестрашни улични тепачи, додека геј момците ги перцепираат како нежни, учтиви и безопасни. Во мислите на јавноста нема смисла дека мажите кои ја преферираат убавата и гламурозна страна на животот можат да се борат за нивните права и идеи.
Колку долго постои GASH?
Нашето движење постои во Русија повеќе од 20 години. Релативно е младо, но доста добро е развиено. Заостануваме малку зад останатите такви групи во Европа и САД, но имаме силна волја и борбен дух, во име на каузата на белата раса.
Значи има слични движења во Америка, како и во европските земји?
Секако дека има. Тие ни сугерираа идеја која долго време сме ја имале во нас. Ни помогнаа да се дефинираме и да ги насочиме нашите активности во потребната насока.
Дали GASH е единствената геј расистичка група во Русија која ја знаете?
Во моментов, таа е најпознато движење помеѓу геј нацистите. Факт е дека повеќето геј скинхедси не се членови на GASH но имаат исти цели и методологија на влијание. Едноставно не го фокусираат вниманието на себе. Не сакаме премногу внимание ниту на нашата супкултура. Сепак, сакаме сите да знаат кои сме и за што се бориме.
Дали сте поврзани со други геј групи?
Да, малку соработуваме со нормалната геј заедница. Понекогаш ги презираме, затоа што нашите акции имаат резултати, а резултатите на нормалната геј заедница во Русија само ја влошува ситуацијата во однос на општеството, хомофобите и хомосексуалците.
Значи го сметате постоењето на GASH за нешто позитивно во Русија, и за геј правата во Русија?
Не се сметаме себеси за херои, ниту за многу позитивни ликови. Имаме ригорозни методи, но функционираат. Се бориме за сите, не само за себе. Се обидуваме да го исчистиме светот од непотребните луѓе кои не вредат да живеат на земјата.
Пааа добро… А кое е твоето мислење за хомофобичните нацисти-скинхедси?
Не се сите хетеросексуални националисти хомофобични; всушност често се латентни хомосексуалци. Се бориме против националистичките хомофоби исто како што се бориме против сите други хомофоби. Не правиме некоја разлика.
Дали се тепате против хомофобичните нацистички групи?
Да, ние сме против хомофобите без разлика на бојата на кожата или националноста. Не разбираме зошто нашите браќа се противат на нас. На крајот на краиштата, немаме ништо против хетеросексуалците и немаме намера целата планета да ја направиме хомосексуална.
Колку членови има GASH?
Тешко е да се каже точниот број. Еден во 50 хомосексуалци е националист или има тенденции кон ова движење. Во групата во која што сум јас, има 1500 до 1700 други постојани членови во Москва или блиските реони. Има и други заедници на геј националисти во Москва – има GASH група во секоја област.
Дали во GASH членуваат лезбејки?
Понекогаш лезбејките не’ контактираат, но им објаснуваме дека за нив нема место во нашите редови.
А што е со трансродовите нацисти-скинхедси? Има ли такви?
Меѓу нас нема транссексуалци и не сметам дека е возможно да бидат меѓу нас.
Зошто е тоа така?
Сметаме дека сме во војна и дека тука нема место за жени или мажи кои се сметаат себеси за жени. Фактот дека ова е машка борба е интегрален дел од нашата идеологија.
Ставате силен акцент на мажественоста. Кој е вашиот став за помалку мажествените геј момци? Дали ги прифаќате во групата?
Ова е контроверзно прашање. Не можам да дадам дефинитивен одговор, затоа што членовите се проценуваат индивидуално. Личноста мора да има одредени квалитети и да верува во нашата идеја. Мора да разбере дека може да биде потребно да го даде својот живот за идејата и заедницата како целина.
Добро, а какви се тие квалитети на ниво на сексуалност?
Нашиот сексуален живот пред се’ се состои од BDSM, особено садомазохизам. Нашите браќа не покажуваат нежност на свилени чаршафи – нашите сексуални акти се навистина мажествени.
Дали BDSM е тесно поврзан со идеологијата на GASH?
Да, тие се тесно поврзани, како чад и оган. Речиси сите националисти имаат пирсинг, традиционални кожни чизми, сини фармерки, кои одамна станаа сексуален фетиш, како и бричени глави. Според нашата природа, сексот е груб. Слично е на примитивната страст. Некои од нас имаат робови, но тие најчесто не се националисти. Го третираме сексот како нешто свето. Слично е на начинот на кон верниците го третираат Господ. Сексот е пренесување на страст, емоции, задоволство, и секако, сперма во телото на братот. Даваме дел од себеси. Ова е многу важен дел од сексуалниот живот. Однадвор, можеби изгледа како да го третираме сексот без размислување, но тоа не е така; секој сексуален чин меѓу браќата има подлабоко значење. Тоа е тајна церемонија меѓу посветените.
Како реагирате на луѓе кои велат дека хомосексуалноста и нацизмот не одат едно со друго?
Нашата сексуална ориентација не е пречка за тоа да бидеме националисти. Духот на национализмот може да биде присутен во секој од нас без разлика на ориентацијата. Во Русија, правата на хомосексуалците се многу ограничени, па ние не можеме да седиме со скрстени раце кога некој е убиен само затоа што е геј. Многу луѓе од Кавкаскиот регион екстремно се противат на хомосексуалците. Некој мора да го отфрли притисокот што тие го прават со брутална сила.
Добро. Како за крај, како реагирате кога некој ќе ви каже дека Хитлер баш и не ги сакал многу геј луѓето?
Во тоа време, постоеле многу строги мерки, но навистина функционирале и вродиле со плод. Не верувам дека Хитлер лично сакал да ги стави хомосексуалците во гасна комора, но идеологијата го барала тоа од него.
Извор: VICE
