Европски суд на правдата: ЛГБТИ луѓето можат да бараат азил во земјите од ЕУ и од нив не смее да се бара да ја кријат својата сексуална ориентација

На 7ми ноември 2013, Европскиот суд на правдата (ЕСП) пресуди во случајот X, Y, Z против Министерот за емиграција и азил, во однос на барањето азил во земјите на ЕУ врз основа на страв од гонење поради сексуалната ориентација на поединецот, во држави во кои хомосексуалноста е криминализирана.

Судот јасно кажа дека од барателите на азил кои бегаат од своите матични земји поради страв од гонење врз основа на нивната сексуална ориентација не може да се очекува „да ја кријат [својата] хомосексуалност во [својата] матична земја или да се воздржуваат од нејзино изразување“. Судот истакна дека сексуалната ориентација е фундаментална карактеристика на идентитетот на личноста и не може да се бара од некого да се откаже од истата.

Судот исто така се задржа и на тоа дека криминализацијата на интимните односи со лица од ист пол е во прилог на наодот дека овие луѓе се членови на одредена општествена група која е подложена на гонење. Ова е потврда дека реалната примена на таквите кривични закони, т.е. изрекувањето затворски казни, сама по себе се смета за гонење.

Судот пресуди како резултат на барањето од Холандија да ги појасни постоечките закони на ЕУ од областа на азилот и оние за минималните стандарди за ЕУ земјите при доделување статус на бегалец.

Евелин Парадис, Извршната Директорка на ИЛГА Европа, изјави:

„Ја поздравуваме денешната пресуда која јасно кажува дека ЛГБТИ лицата кои се баратели на азил од многуте земји низ светот припаѓаат на одредена општествена група која е обединета поради насилството, деградирачкиот третман и стравот од гонење поради нивната сексуална ориентација и имаат право да бараат азил во земјите на ЕУ.

Особено го поздравуваме одбивањето на сосема неразумните и деградирачки услови во некои земји, каде што на ЛГБТИ лицата баратели на азил им било сугерирано да ја „прикријат“ својата хомосексуалност, да бидат „дискретни“ и на тој начин да бидат „безбедни“ во нивните матични земји. Се надеваме дека ова ќе стави крај на ваквата практика, наречена „аргумент на дискреција“, која државните власти ја користат за да ги вратат ЛГБТИ лицата баратели на азил во нивните матични земји.“

Соопштение за медиуми на Европскиот суд на правдата (англиски)

Пресуда на Европскиот суд на правдата (англиски)

Извор: http://ilga-europe.org/home/news/for_media/media_releases/eu_court_of_justice_lgbti_people_are_eligible_group_for_claiming_asylum_in_eu_and_they_cannot_be_requested_to_conceal_their_sexual_orientation