Како да се биде вистински маж? Класичниот маж од соништата? Одговорот ќе го пронајдеш во чинија со доза шовинизам полна со лаги и омраза, најчесто предобро скриена. Дојди, најади се, напиј се, уживај во помислата за твојот идеал за еден прав маж и исповрати се. Mислам дека традицијата се почесто да слушнеш од еден хетеросексуален маж, воспитан во едно патријархално општество каде плука по “педерите” станува тренд и кај “педерите”.
‘Абе супер што си геј, само немој да си феминизиран’;‘Ако си геј значи си маж што сака мажи, зошто ги правиш тие потези со рацете?’ ‘Немој да се жуљавиш ко жена’; ‘Не ми се понашај ко тетка’, се најчесто нови изрази кои ќе ги слушнете од геј мажите. Немаме веќе проблем дали си геј или стрејт, туку прогоните од минатото кон жената и се што е женствено мислам дека се враќаат во мода и тоа од една група на луѓе, кои најмалку имаат право и образ за тоа.
Исфеминизираните мажи, настрана нивната сексуална определба која нема никаква улога тука, се најранливата, најмаргинализираната и најомразената група луѓе во едно вакво општество. Предавници на родот, на идентитетот на татко си. Роден си маж, биди маж до крај. Такви не биле ни дедо ти, ни прадедо ти, иначе ни ти не би бил тука кај што си. Јас ќе ти речам дека луѓето поседуваат две сили, тие се два пола без разлика како се родени, дека може едниот да го негуваме повеќе од другиот. Ти ќе ми удриш шлаканица во име на нацијата.
‘Немој да стенкаш ко жена’ ми велиш за време на секс, додека твојот златен крст што ти го подарил татко ти, ми виси над очите. Тогаш ќе те прашам за твојата најдобра другарка која е помаж и од тебе. Молчиш, затоа што е добро да си маж, да го посакуваш истото, тоа е симбол на храброста и на силата но не е во ред да си жена, да имаш било каква карактеристика по која ги дефинираш жените, тоа е омаловажување на машкоста и на сите мажи околу тебе, всушност не е во ред да си жена, но Господ прави грешки нели? Ти ќе ми удриш шлаканица во име на религијата.
На твоето прашање која ми е омилена боја, ќе ти одговорам црвената, а ти со надеж дека ќе ме поправиш во иднината да бидам идеалниот принц на Пепелашка, ќе ми речеш дека тоа е педерска боја. После две минути ќе ме залапаш, како да си Пепелашка всушност. Јас ќе ти речам дека живееме во патријархален шовинизам а ти ќе ми речеш дека тоа е лага на феминистките, кои всушност за тебе се само жени, едни од оние жени, оние ‘курви’ што никогаш нема да ти клекнат на колена. Ти ќе ми удриш шлаканица во име на машкоста.
Девојката на твојот другар била многу уморна од работа и не стигнала да му подготви ручек, па тој е сега жртва на некое си феминистичко движење. Стравуваш и ти да не бидеш виктимизиран на ист начин како него. Јас сеуште ќе мислам дека стравуваш длабоко во себе од тоа што го имаш во тебе, жена. Онака права вистинска жена, која што секој ден ја убиваш со шовинистичките оброци кои ги јадеш. Ја гушиш и понижуваш во себе со помислата дека ти си маж, прав маж, онаков каков секој би посакал. Не бе душо, ти не си воопшто подобар од сите оние хомофоби, шовинисти, националнисти кои јавно си ја искажуват својата омраза. Силата на еден човек не лежи во неговиот изглед, ниту во неговата агресија, таа е внатре во тебе. А после толку векови мачење и прогони на жената и денес сето тоа иронично потсемвање и деградирање на жената како индивидуа, да бидеш маж кој што е исфеминизиран е најхрабро нешто. Сега јас ќе ти удрам шлаканица, во име на мајка ти.
Автор: Љуми Бекир
