По повод 8ми март, ЛезФем ги здружи своите сили со девојките од „Бори се женски“, иницијатива посветена на промовирање на родовата рамноправност преку поттикнување дебата во јавната сфера. Двете групи со помош на ЛГБТИ центарот за поддршка и Коалицијата за сексуални и здравствени права на маргинализираните заедници го остварија својот прв заеднички настан кој беше спроведен во два дена.
На 7ми март 2013 беше проектиран документарен филм кој се фокусира на панк-порно феминистичкото движење. Филмот беше проектиран со цел да се допре и до не толку достапната перспектива на нашите простори на феминизмот кон порнографијата.
За разлика од други феминистички движења кои гледаат на порнографијата како експлоатирачка и понижувачка, панк порно феминизмот ги гледа сексот и порнографијата како алатки на ослободувањето, каде што жените избираат и контролираат како да се изразат себеси сексуално, верувајќи дека тоа го отелотворува феминизмот. Филмот опфаќа теми како што се кампањата за легализирање на проституцијата во САД, феминистичка S & M порнографија, трансродова еротика и квирактивизам.
По проекцијата на филмот следуваше дискусија на тема „Феминизам, сексуалност и отпор“ со Катерина
Колозова и Славчо Димитров, експерти од областа.
Катерина Колозова е директорка и постар истражувач во Институтот за општествени и хуманистички науки- Скопје, професорка по филозофија и родови студии во Универзитетот „American College“- Скопје. Покрај ангажманот во својот институт, таа исто така предава во неколку универзитети во Поранешна Југославија и Бугарија. Таа е авторка на “The Lived Revolution: Solidarity with the Body in Pain as the New Political Universal” (2010; in English), “The Real and ‘I’: On the Limit and the Self” (2006; in English), „Разговори со Џудит Батлер: криза на субјектот“ со Џудит Батлер и Жарко Трајаноски, и уредничка на повеќе книги од областа на родовите студии и феминистичката теорија.
Славчо Димитров дипломирал Општа и компаративна книжевност на Универзитетот „Св. Кирил и Методиј“ и е магистер по Родови студии и филозофија на Институтот Евро Балкан. Во моментов тој е студент на докторските студии на одделот за Род и Филозофија на Институтот Евро Балкан кадешто работи како истражувач, асистент и координатор на проекти. Во последниве години тој координирал неколку проекти кои се занимаваат со човековите права и не-дискриминација на малцински заедници во Македонија. Во моментов тој е директор на Коалицијата „Сексулани и здравствени права на маргинализирани заедници“. Публикувал неколку текстови на теми од книжевната и филмска теорија и интерпретација, род, сексуалност и идентитет и современа уметност во Македонија, во различни публикации од академска и уметничка област во земјата и надвор. Неговите главни теоретски и авторски интереси се поврзани со прашањата за родот, културната теорија, политичката филозофија, идентитетот и нарациите, деконструкција на субјектот и квир теоријата.
На 8ми Март ЛезФем заедно со Бори се женски излегоа на улици поставувајќи транспаренти со кратки биографии на жени борки од минатото но и сегашноста за кои малку или вопшто не се зборува и кои ретко се спомнуваат во официјалните документи за историјата на Република Македонија. Решивме дека во името на овој ден е битно да покажеме дека истите постојат, па тоа го направивме на слимболичен начин поставувајќи ги нивните фотографии и кратки биографии на стратешки места низ градот. Акцијата помина доста успешно и уште додека траеше беше привлечен интересот на случајните минувачи. Исто така иако непланирано, двете групи се сретнаа со здружението на жените борки од Македонија кои беа собрани по повод 8ми март во „Жена парк“. Беа споделени искуства и ставови при што акцијата доби еден необичен пресврт со што и се заокружија напорите за доближување на жените борки до случајните минувачи.
Повеќе за акцијата можете да видите на следниот линк.
На 8ми Март 2013 ЛезФем се претстави за прв пат како неформална група на настанот со име “Прво па Женско” иницијатива во организација на „Тииит!Инк“, која имаше за цел да поттикне одново промислување на значењето на 8-ми март – Меѓународниот ден на жената и се одржа во Младинскиот културен центар во Скопје.
Со неколку работилници во „Женската соба“, изложба на фотографии, базар и филмска програма, повеќе граѓански организации, активисти и уметници, низ дискусија и креативна размена во обид да се влијае на подобрување на политиките кои се однесуваат на жената ЛезФем ја претстави својата цел како зголемување на видливоста и политичката релевантност на лезбејскиот и феминистичкиот активизам, преку понуда на свежи стратегии на отпор кон доминантните идеолошки концепти на патријархатот, хетеронормативноста, шовинизмот и национализмот.
Презентацијата помина неформално и отворена за разговор каде на заинтересираните им беа објаснети целите и активностите кои ги планира ЛезФем и беа поканети да присуствуваат на сите идни настани и да се вклучат во планираните акции.
Повеќе за гостувањето на ЛезФем на настанот може да видите на следниот линк.
