Во последниот Извештај за напредокот на Република Македонија, подготвен од Европската комисија, наодите за ЛГБТИ заедницата се поместени во делот на „Фундаментални права“. Во продолжение, го пренесуваме интегралниот текст од Извештајот, а во врска со состојбите со правата и слободите на ЛГБТИ луѓето во Република Македонија:
„Лезбејките, геј луѓето, бисексуалците, трансродовите и интерсекс лицата (ЛГБТИ) и понатаму се соочуваат со дискриминација и дискриминација од страна на медиумите, како оние електронските, така и другите. Се случи и шестиот насилен напад, за време на прославата на две години од постоењето на ЛГБТИ Центарот за поддршка, каде што беа повредени две лица. И покрај повиците на организациите од цивилниот сектор, како и меѓународната заедница, за сторителите да бидат казнети, ниту еден од нападите не е целосно истражен. Во август, собранието го одби нацрт-амандманот со кој требаше да се промени анти-дискриминациската легислатива, така што ќе беше забранета било која форма на директна и индиректна дискриминација по основ на сексуална ориентација и родов идентитет. И понатаму се потребни дополнителни напори за кревање на свеста и почит за различноста во рамки на општеството, и спротивставување на нетолеранцијата. Тоа треба да биде направено со јавни кампањи и тренирање на односните правни страни за унапредување на правниот систем, како обвинителите, судиите и здравствените работници.“
Како што може да се увиди од наодите на Европската комисија, и понатаму официјалните политики во врска со ЛГБТИ заедницата, во македонското општество, придонесуваат кон хомофобичен амбиент во кој ЛГБТИ луѓето се соочуваат со константно прекршување на нивните човекови права и слободи. Исто така, експлицитното наведување на нападите и отсуството на институционално процесирање на случаите, наведува на тоа дека е потребен професионален и неселективен третман на ЛГБТИ луѓето и со тоа овозможување на пристап до правда.
Понатаму, преку наодите од параграфот посветен на ЛГБТИ луѓето се потенцирани активностите на организациите од цивилниот сектор, како конструктивни и насочени кон заштита и застапување на заедницата.
Конечно, со опфаќањето на предлог-мерките за јавни кампањи и стручни тренинзи, со кои ќе се спротивставиме на нетолеранцијата, Европската комисија упатува на потребата од јавен ангажман на властите кои треба да придонесат кон пријателски амбиент за сите граѓани, без оглед на нивните фундаментални карактеристики.
