Српски десничарски екстремисти ги шпионираат геј луѓето

Српската екстремно десничарска група СНП Наши поставува камери за набљудување во приватни станови близу новиот лезбејски и геј центар во обид да го затвори истиот.

На почетокот овој месец, СНП Наши најави дека ќе започне со поставување на камери во приватни станови на ул. Краљице Наталије во Белград, каде лезбејките и геј мажите го отворија својот прв центар во градот за поддршка на заедницата.

Тие велат дека сакаат да соберат докази дека од страна на ЛГБТ центарот се организира “проституција„ и тие докази да и ги предадат на полицијата.

“Поради стравот за децата (во соседството), поради луѓето кои доаѓаат и поради ризикот од инфекции, СНП Наши ќе помогне да се затвори ЛГБТ центарот каде се организира проституција„ изјавија од СНП Наши.

Според десничарската група, планот е резултат на иницијатива од страна на луѓе кои живеат во околните згради и кои ја имаат дадено својата согласност за инсталирање на камери во нивните домови.

Центарот е отворен само за ЛГБТ луѓе за социјализирање и овозможување пристап до информации. Надворешните гости мора да бидат однапред најавени.

Геј активистот Предраг Аздејковиќ рече дека членовите на СНП Наши треба да бидат уапсени поради тоа што се дел од “пара-полициска организација„.

“Не знам што замислуваат дека се, но во оваа држава постои полиција и полицијата истражува (такви случаи)“ рече Аздејковиќ.

Според спроведените испитувања, српското општество продолжува да биде длабоко хомофобично, како резултат на што геј луѓето најчесто живеат во изолација со висок степен на тајност.

Во 2009,2011 и 2012 властите забранија одржување на геј прајд паради, откако полицијата изјави дека не може да ја гарантира безбедноста на марширачите, како резултат на заканите за насилство кои доаѓаа од десничарските групи.

Во 2010 се одржа геј прајд парада, но неколку илјади млади луѓе, вклучително и фудбалски навивачи и припадници на десничарски организации, фрлаа камења и проектили кон полицијата и запалија повеѓе згради и возила.

Оваа година, организаторите најавија дека белградскиот Геј Прајд ќе биде обележан од 20-ти до 29-ти Септември, додека централниот марш низ главниот град е закажан за 28-ми Септември.

Извор: balkaninsight, 18.06.2013